KMSH,seminar për Dialogun Ndërfetar në Seminarin Ndërdioqezian

Apr 13, 2014 Zani i Nalte Aktivitete 0

Më 10 prill 2014 Drejtoria e Kulturës dhe e Dialogut Ndërfetar në KMSH zhvilloi një seminar për dialogun ndërfetar dhe rëndësinë e tij në Islam, në Seminarin Ndërdioqezian Shkodër, seminar ky i zhvilluar me ftesë të drejtorit të kësaj shkolle të lartë, At Mario Imperatori.

Ky takim dhe seminar është zhvilluar në vazhdën e takimeve dhe në kuadër të ftesave të përvitshme nga At Mario në bashkëpunim me Drejtorinë e Kulturës dhe Dialogut Ndërfetar në KMSH.

Në seminarin që shtrihej në dy orë leksioni, pjesë e programit mësimor të studentëve, referuan drejtori i Drejtorisë së Kulturës dhe Dialogut Ndërfetar në Komunitetin Mysliman z. Genti Kruja, si dhe pedagogu në Departamentin e Shkencave Islame në Universitetin Bedër, njëkohësisht imam në xhaminë Et’hem Bej, z. Elton Karaj, të cilët kanë folur për rëndësinë që i jep Islami Dialogut dhe Harmonisë Ndërfetare, si dhe për traditën tonë shekullore përsa i përket bashkëjetesës ndërfetare tek shqiptarët.

Rektori i kësaj shkolle, Dom Leonardo Falco, nga ana e tij falënderoi përfaqësuesit e KMSH-së për këtë seminar si dhe shprehu gatishmërinë për bashkëpunime të tjera në të ardhmen.

Z. Kruja i ftoi drejtuesit e lartë të Shkollës për një vizitë në Komunitetin Mysliman, si dhe në Universitetin Bedër, ftesë e cila u pranua me kënaqësi.

Të dyja palët kanë shkëmbyer me njëri-tjetrin botimet e veta, për t’u njohur nga afër me punën dhe botimet që bëhen sidomos në kuadër të dialogut ndërfetar.

Seminari Ndërdioqezian është një Shkollë e Lartë,e cila përgatit kuadrot e ardhshëm të klerit katolik dhe ka studentë nga Shqipëria, Kosova dhe Mali i Zi.