Zhvillohet konferenca shkencore “25 vite Drita Islame”

Mar 01, 2017 Zani i Nalte Aktivitete 0

Revista “Drita Islame” dekorohet me urdhrin e artë “Naim Frashëri” nga Presidenti i Republikës së Shqipërisë SH.T.Z. Bujar Nishani.

Komuniteti Mysliman i Shqipërisë ka zhvilluar me dt. 28 shkurt 2017 konferencën shkencore “25 vite Drita Islame”, në kuadër të 25 vjetorit të themelimit të organit të parë mediatik të Komunitetit Mysliman, revistës “Drita Islame” pas viteve ‘90.

Në këtë përvjetor jubile Presidenti i Republikës së Shqipërisë SH.T.Z. Bujar Nishani, i ka akorduar revistës “Drita Islame” titullin “Naim Frashëri” me motivacion “Për kontributin e saj në zgjimin e ndërgjegjes fetare e kombëtare, me anë të promovimit të atdhedashurisë, harmonisë, mirëkuptimit, kulturës e vlerave humane të besimit Islam në mbarë kombin shqiptar”, duke ia dorëzuar kreut të KMSH-së H. Skender Bruçaj.

Në konferencë ishin të pranishëm Presidenti i Shqipërisë z. Bujar Nishani, kryetari i KMSH-së Haxhi Skender Bruçaj, Kryegjyshi Botëror i Bektashinjve H. Dede Edmond Brahimaj, Myftiu i Kosovës Naim ef. Tërnava, përfaqësuesi i Bashkësisë Islame të Maqedonisë Myftiu i Gostivarit Shaqir ef. Fetahu, rektori i Universitetit Bedër Prof. Dr. Ferdinand Gjana, dekanë të fakulteteve të Shkencave Islame të Tiranës, Prishtinës dhe Shkupit, kryetarja e Komitetit Shtetëror për Kultet znj. Loreta Aliko, kryeredaktori i parë i periodikut “Drita Islame” z. Ismail Muçej, përfaqësues të Trupit Diplomatik dhe të bashkësive fetare, drejtues të medreseve dhe shoqatave islame, akademikë, profesorë, studiues, myftinj, imamë, besimtarë, etj.

Në fjalën e tij në ceremoninë e hapjes presidenti z. Bujar Nishani vlerësoi rëndësinë dhe kontributin e “Dritës Islame” në çështjen fetare e kombëtare si dhe për standardet e saj të larta.

“Në janarin e këtij viti u mbushën plot 25 vjet nga lindja e kësaj gazete, që përbën një datë simbol edhe për historinë e shtypit të lirë në Shqipëri. Ka mbi 25 vjet, që dielli u shfaq rishtazi mbi mjegullën, që ndenji aq gjatë mbi vendin, tokën, njerëzit, shtëpitë, shpirtrat dhe besimet tona. Si toka në dritën e diellit ndriçoi edhe “Drita Islame”, gazeta juaj e përdëllyer. Ju i gëzoheni këtij realiteti të ri me gjallërinë karakteristike që ju portretizon.

25 vjet më parë ‘Drita Islame’ ndezi dritën e saj për të mos ta shuar më kurrë. Ashtu si në këto 25 vjet kur ajo ka shkëlqyer me standardet e saj të larta, unë uroj që edhe për ne, lexuesit e saj, ajo të mbetet gjithmonë ‘dritë’.

Diku në fillim të shekullit XIX, në qytetin Vajmar të Gjermanisë, shkrimtari gjerman Gëte i mbylli sytë me fjalët “dritë”, ‘më shumë dritë’, e unë duke parë përputhshmërinë, jo edhe aq rastësore të fjalës ‘dritë’ të Gëtes në ‘Dritën Islame’, marr shkas, që këtë fjalim vlerësimi për gazetën, apo revistën tuaj ta mbyll me urimin: ‘Dritë, sa më shumë dritë në kulturën tonë dhe në faqet e ‘Dritës Islame’ që mendjet e shpirtrat tonë të ndriçohen nga mirësia njerëzore!”, tha mes të tjerash presidenti Bujar Nishani.

Kryetari i Komunitetit Mysliman H. Skender Bruçaj, u shpreh se “Drita Islame” është një paketë optimale, e cila ofron këshillat dhe udhëzimet më të mira, me zbatimin e të cilave njeriu bëhet më i denjë për familjen, më i dobishëm për shoqërinë dhe për kombin në tërësi.

“Në këtë përvjetor të themelimit të saj, revista “Drita Islame” vjen me dëshirën për të hyrë në shtëpinë e çdo myslimani dhe pse jo të çdo shqiptari, që do të mësojë sadopak për myslimanët, jetën dhe vizionin e tyre.

Duke përgëzuar të gjithë ata që janë bërë pjesë e kësaj reviste, si dhe stafin e saj për punën e kryer, që ajo të dalë në formën më të mirë, i urojmë jetë të gjatë dhe kandili i saj mos u shuajt kurrë”, theksoi z. Bruçaj.

Rolin dhe kontributin e revistës e përshëndetën edhe krerët dhe përfaqësuesit e bashkësive islame të Kosovës dhe Maqedonisë, si dhe kreu i bektashinjve.

Seanca e hapjes së konferencës u moderua nga nënkryetari i KMSH-së z. Gazmend Aga, ku në fillim u shfaq edhe një dokumentar mbi historikun e gazetës (revistës).

Pas seancës së hapjes konferenca ka vijuar me promovimin e librit “Bibliografia e gazetës Drita Islame (1992-2011)”, si dhe me tre sesionet shkencore, ku referuan studiues të ndryshëm nga Shqipëria, Kosova dhe Maqedonia.

Në fund, Drejtoi i Kulturës, z. Dorian Demetja dhe Drejtori i Medias, z. Agron Hoxha shpërndanë çertifikata mirënjohje për kontribuuesit e saj ndër vite.

28 shkurt 2017