Zhvillohet seminari i VI-të “Kur librat flasin”

Feb 13, 2018 Zani i Nalte Aktivitete 0

Departamenti i Shkencave Islame në bashkëpunim me klubin studentor “Mesazhi i Jetës”, në kuadër të vazhdimit të ciklit të seminareve “Kur librat flasin”, zhvilluan më datë 8 shkurt 2018, takimin e gjashtë, ku kanë diskutuar rreth veprës “Tre elementët e strukturës së Fesë Islame” me të ftuar autorin e këtij libri z. Xhemal Balla, si dhe Dekanin e Fakultetit të Shkencave Humane, Bedër, Prof. Asoc. Dr. Rahim Ombashi.

Gjatë aktivitetit, nën moderimin e studentit Abdullah Bulku, Prof. Rrahim Ombashi bëri një prezantim të veprës dhe me korpusin fetar, kulturor e shkencor që do mund të gjenim në këtë vepër.

Ndërkohë që i ftuari i këtij aktiviteti autori z. Xhemal Balla, bëri një analizë të përgjithshme të veprës, si dhe foli më gjerë rreth tre elementeve të Fesë Islame, siç janë Islami, Imani dhe Ihsani. Ai foli gjithashtu edhe për shkaqet, që e kishin shtyrë deri në realizimin e kësaj vepre dhe nevojën e shoqërisë sonë për një punim të tillë.

Libri është i ndërthurur me një pasuri argumentesh, sa nga burimet bazë të fesë (Kur’ani dhe Suneti), ashtu edhe nga shkenca dhe historia. Metoda me të cilën autori e prezantoi veprën tregon se libri nuk është synuar vetëm në përmbushjen e nevojave të besimtarëve myslimanë, por ai u drejtohet edhe atyre, që duan ta studiojnë, apo të njihen me argumentet e besimit Islam. Ndërkohë që z. Balla ftoi të gjithë studentët e Departamentit të Shkencave Islame të shfrytëzojnë materialet e këtij libri, por edhe të zgjerojnë hulumtimet e tyre drejt kërkimeve shkencore në të ardhmen.

Cikli i seminareve “Kur librat flasin” do të vazhdojë gjatë javëve në vijim me të ftuar të tjerë, të cilët do të analizojnë dhe bashkëbisedojnë me studentët për një sërë veprash të autorëve të ndryshëm.