Promovohet libri “Pishtari i Njerëzimit” i studentit të Shkencave Islame, Bedër

May 10, 2018 Zani i Nalte Aktivitete 0

Klubi “Mesazhi i jetës” dhe Shtëpia Botuese “Thesari” në bashkëpunim me Departamentin e Shkencave Islame, ditën e mërkurë me dt. 9 maj 2018, organizuan aktivitetin e promovimit të librit më të ri me autor studentin e këtij departamenti Kushtrim Reshiti, në ambientet e bibliotekës së Kolegjit Universitar Bedër.

Në aktivitet ishin të pranishëm Prof. Asoc. Rahim Ombashi, Dekan i Fakultetit të Shkencave Humane, Dr. Genti Kruja, Përgjegjës i Departamentit të Shkencave Islame, Prof. Miftar Ajdini, mësues i Gjuhës Arabe në medresenë e Prizrenit, poeti Ibrahim Skenderi, kryetar i grupit letrar “Luigj Gurakuqi”, drejtori i Sh.B. “Thesari” z. Demir Reshiti, familjarë të autorit, si dhe pedagogë dhe studentë të Departamentit të Shkencave Islame, Bedër.

Dr. Genti Kruja në fjalën e tij përshëndetëse përgëzoi studentin Kushtrim Reshiti për punimin e tij, duke uruar që kjo vepër të jetë një shtysë edhe për studentët e tjerë për të kontribuar në përcjelljen e Islamit në trevat shqiptare në linjën e të parëve tanë.

Më pas Prof. Miftar Ajdini foli rreth misionit fisnik të Profetit Muhammed (a.s.), ku dhe përgëzoi studentin për punën dhe përpjekjen e tij në realizimin e kësaj vepre. Poeti Ibrahim Skenderi foli për aktivitetin e Sh.B. “Thesari” dhe grupit letrar “Luigj Gurakuqi” në promovimin e krijimtarive letrare veçanërisht të të rinjve dhe për mbështetjen që Sh.B. “Thesari” ka dhënë dhe vazhdon të japë në botimin e veprave të ndryshme.

Prof. Asoc. Rahim Ombashi përgëzoi studentin, duke i uruar sukses në rrugëtimin e tij të dijes dhe në realizimin e sa më shumë veprave, të cilat do të kontribuojnë në edukimin e shoqërisë. Gjatë aktivitetit studentët e Departamentit të Shkencave Islame Sefer Vrana, Aristil Toska dhe Edon Krasniqi lexuan disa poezi nga libri i autorit “Pishtari i Njerëzimit”.

Aktivitetin e ka përshëndetur nga SHBA edhe ish-mësuesi dhe autori i parathënies së këtij libri Imam Gazmend Aga nëpërmjet një video mesazhi.

Në fund fjalën e mori autori i librit, i cili është njëkohësisht edhe djalë dëshmori dhe vjen nga Kosova si student i vitit të dytë në Shkencat Islame. Ai falenderoi të gjithë organizatorët për mbështetjen e tyre në promovimin e librit, gjithashtu falenderoi edhe kontribuuesit, që mundësuan realizimin e tij, duke mos harruar edhe pjesëmarrësit në këtë organizim.

Më pas, studenti Haki Sahitaj, kryetar i Klubit “Mesazhi i Jetës” e mbylli aktivitetin duke falenderuar organizatorët dhe pjesëmarrësit për realizimin e këtij aktiviteti.