Departamenti i Shkencave Islame, BEDËR zhvillon takim online me 7 brezat e diplomuar

May 22, 2020 Zani i Nalte Aktivitete 0

Departamenti i Shkencave Islame ka zhvilluar sot me dt. 22 maj 2020, një takim online “Alumni 2020” me dhjetëra të diplomuar në shtatë breza në këtë departament.

Duke qenë se shumica e tyre janë shpërndarë, studiojnë, jetojnë, apo punojnë në shtete të ndryshme të botës, ky aktivitet ka ringjallur emocione dhe mbresa midis të diplomuarve dhe pedagogëve që kanë qenë pjesë e departamentit në vitet 2011-2020.

Në këtë program merrnin pjesë edhe pedagogë dhe ish-lektorë të Departamentit të Shkencave Islame, të cilët kanë ndarë me ish-studentët kujtime dhe nostalgji nga vitet e studimit në auditorët e Universitetit Bedër.

Aktivitetin e kanë përshëndetur dhe drejtues të institucioneve të ndryshme, si Presidenti i Fondacionit “H. Ali Korça” z. Skender Bruçaj, nënkryetari Komunitetit Mysliman të Shqipërisë z. Taulant Bica, Dekani i Fakultetit të Shkencave Humane Prof. Rahim Ombashi, Përgjegjësi i Departamentit të Shkencave Islame Dr. Genti Kruja, etj.

Programi ka vijuar më përshëndetje dhe fjalë nga shumë të diplomuar nga breza të ndryshëm. Ndërkohë është vlerësuar me një certifikatë për arritjet e saj dhe mesataren më të lartë të brezit të shtatë, studentja e vitit të tretë Bachelor, e cila diplomohet këtë vit, Sonila Habili.

Deri tani Departamenti i Shkencave Islame ka diplomuar më shumë se 150 studentë nga 13 shtete të ndryshme të botës.