Perditësimi i fundit August 10th, 2023 9:08 AM
Departamenti i Shkencave Islame, Bedër partner ndërkombëtar në fushën akademike të Dialogut Ndërfetar
Departamenti i Shkencave Islame është bërë pjesë e një programi Master falë një bashkëpunimi me Institutin e Lartë të Studimeve Religjioze në Rimini të Italisë në bashkëpunim me Shkollën e Lartë të Studimeve Historike në Universitetin e Republikës së San Marinos. Partneriteti i disa institucioneve akademike ndërkombëtare ka bërë të mundur hapjen për herë të parë të një programi studimi pasuniversitar mbi Dialogun Ndërfetar dhe Marrëdhëniet Ndërkombëtare.
Ky partneritet i Departamentit të Shkencave Islame, vjen pas pjesëmarrjes së tij në një konferencë ndërkombëtare, mbajtur në tetor 2018 dhe organizuar nga Instituti i Lartë i Studimeve Religjioze në lidhje me modelin shqiptar të dialogut ndërfetar. Pas kësaj konference, Instituti në fjalë, ka ftuar zyrtarisht Departamentin e Shkencave Islame në Universitetin Bedër për të qenë partner i një programi pasuniversitar, i cili do të realizohej në bashkëpunim me Universitetin e San Marinos. Partnerë të këtij programi janë gjithashtu dhe disa institucione fetare dhe akademike kryesisht nga Italia dhe Shqipëria, të cilët po japin një kontribut në zhvillimin e dialogut ndërfetar.
Në përfundim të këtij programi 2-vjeçar (2018-2020), Instituti i Lartë i Studimeve Religjioze i ka dërguar një letër falënderimi Departamentit të Shkencave Islame, Bedër për bashkëpunimin si partner i këtij programi.
Ky program synon një vështrim objektiv të fenomenit fetar, së bashku me historikun dhe krahasimin e kulturave të ndryshme fetare. Ai synon të shtjellojë një kulturë të themeluar epistemologjikisht të dialogut ndërfetar dhe marrëdhënieve ndërkombëtare.
Kjo rrugë akademike i kushton vëmendje të veçantë zonës së Ballkanit dhe Mesdheut, për të favorizuar një zhvillim inovativ dhe konkret të rrjeteve të solidaritetit dhe për të promovuar paqen dhe bashkëjetesën ndërfetare dhe ndërkulturore.
Programi ka gjithsej 60 ECTS (kredi universitare), ekuivalent me një Master universitar të nivelit të parë dhe ndër të tjera synon të eksplorojë format antropologjike, kulturore, gjuhësore, filozofike, teologjike dhe mistike të traditave të ndryshme fetare, në mënyrë që të kuptojë më thellë rrënjët e civilizimeve të ndryshme dhe identitetet kulturore, zhvillimin e tyre historiko-politik, përhapjen dhe ndikimin e tyre, etj.
Programi vlen kryesisht për të diplomuarit në:
- Shkencat Teologjike
- Të diplomuar dhe doktorantë në Histori e Feve dhe Filozofi e Feve
- Të diplomuar dhe studentë të doktoratës në disiplina juridike, marrëdhënie ndërkombëtare, histori të doktrinave politike dhe të ngjashme
- Të diplomuar dhe doktorantë në Letërsi, Filozofi dhe Shkenca Politike
- Diplomantë të rinj nga e gjithë Ballkani dhe zona e Mesdheut
- Operatorët në fushën e Dialogut Ndërfetar
- Operatorët e Marrëdhënieve Ndërkombëtare, Mësuesit e profileve të ngjashme, etj.
Vëmendje e veçantë i kushtohet edhe profileve të mëposhtme profesionale si:
- Studiuesit në Shkencat Fetare, që punojnë në Universitetet Evropiane dhe në vendet e zonave të Ballkanit dhe Mesdheut
- Anëtarët e Korpusit Diplomatik dhe Konsullor të vendeve evropiane, zonës së Ballkanit dhe Mesdheut
- Ekspertë dhe konsulentë ndërkombëtarë në fushën e marrëdhënieve ndërkombëtare, politikave kulturore dhe integrimit shoqëror
- Edukatorë dhe mësues të specializuar në fushën e trajnimit/edukimit në dialog ndërfetar dhe ndërkulturor
- Studiues dhe akademik të rinj universitarë
- Mësuesit e shkollave fetare;
- Ekspertë të komunikimit në sektorin ndërfetar dhe ndërkulturor, etj.
Programi i titulluar “Dialog Ndërfetar dhe Marrëdhënie Ndërkombëtare” është i sponsorizuar dhe i akredituar nga Fakulteti Teologjik i Emilia Romagna dhe njihet dhe nga Ministria e Arsimit e Italisë.
Faqja e programit:
Artikuj të ngjashëm
Me shumë në këtë kategori
Aktivitete
Studime
Gjuhë-letërsi
Sociologji
1923 – 1939
1939 – 1945
Zani i Naltë (35)
