Zani i Naltë – Promovohet libri “Kurora mbi krye të përunjur” me autor Fatos Kopliku

Promovohet libri “Kurora mbi krye të përunjur” me autor Fatos Kopliku

Mar 17, 2021 Zani i Nalte Aktivitete 0

Departamenti i Shkencave Islame, Bedër në bashkëpunim me Klubin Studentor të “Mendimit, Kulturës dhe Artit Islam” zhvilluan sot më datë 17.03.2021, Seminarin e IX “Kur librat flasin” me fokus kryesor promovimin e librit “Kurora mbi krye të përunjur” me autor Fatos Kopliku.

I ftuari special në seminarin të moderuar nga Dr. Genti Kruja, Përgjegjës i Departamentit të Shkencave Islame, Bedër dhe Ardita Kryeziu, Presidente e klubit studentor “Mendimi, Kultura dhe Arti Islam”, ishte autori i librit z. Fatos A. Kopliku në një lidhje të drejtpërdrejt nga Washingtoni, SHBA, ku jeton dhe punon prej disa vitesh. Ai është diplomuar për Biologji dhe Gjenetikë Molekulare nga Universiteti i Bosforit (Boğaziçi) në Stamboll, ka kryer një Master në gjenetikë në Universitetin e Massachusetts-it, Amherst, dhe një Master në pedagogji në Universitetin Amerikan në Washington, DC.

Kopliku prezantoi në mënyrë të përgjithshme ecurinë e kërkimit shkencor të kësaj vepre, e cila vjen si një përmbledhje e 12 artikujve, të botuar gjatë viteve 2013-2019 në revistën shkencore “Zani i Naltë”, si një përsiatje mbi Fenë, Folklorin dhe Shkencën, botuar në Tiranë para pak ditësh.

Më pas seminari vazhdoi me pyetje dhe përgjigje lidhur me artikuj të ndryshëm nga libri “Kurora mbi krye të përunjur”, ku autori sqaroi më në detaje domethënien dhe vlerën që këto punime akademike kanë për shoqërinë njerëzore në vendin tonë dhe më gjerë.