Zani i Naltë – Instituti për Lirinë e Besimit dhe Demokracinë në Universitetin Bedër aktivitet me studentë nga trevat shqiptare

Instituti për Lirinë e Besimit dhe Demokracinë në Universitetin Bedër aktivitet me studentë nga trevat shqiptare

Sep 18, 2021 Zani i Nalte Aktivitete 0

Instituti për Lirinë e Besimit dhe Demokracinë në Universitetin Bedër ka zhvilluar një program tre ditor (15-17 shtator 2021) me mbështetjen e Ambasadës Amerikane në Tiranë, duke mbledhur bashkë studentë nga Shqipëria, Kososova, Maqedonia e Veriut dhe Mali i Zi.

Programi përfshinte studiues dhe akademikë nga SHBA dhe Shqipëria, të cilët me anë të kumtesave të tyre kanë ndarë opinionet lidhur me lirinë e besimit dhe demokracinë.

E ftuara speciale si folëse kryesore në këtë program ka qenë profesoresha amerikane në Kings College, Prof. Dr. Beth Amiraal, e cila është ndalur në lirinë e besimit dhe demokracinë në Shtetet e Bashkuara. Aktiviteti ka vijuar me disa seanca shkencore dhe tryeza të rrumbullakëta, ku kanë diskutuar përfaqësues të komuniteteve të ndryshme fetare në vendin tonë dhe studiues nga institucione të ndryshme akademike.

Programi i Institutit për Lirinë e Besimit dhe Demokracinë përbëhej nga leksione, diskutime, prezantime studentore, leksione nga ekspertë të huaj e bendas, si dhe vizita në komunitetet fetare dhe objektet e kultit.

Projekti është i frymëzuar nga Studimi i Institutit Amerikan mbi Pluralizmin Fetar në Shtetet e Bashkuara. Qëllimi i programit ishte të sigurojë bazat e nevojshme historike dhe teorike mbi studimin e lirisë fetare dhe të demokracisë, të diskutojë specifikat e situatës në Shqipëri dhe të angazhojë studentët në eksplorimin e mënyrave për të rritur harmoninë fetare në Shqipëri.

Ky është dhe viti i tretë i organizimit të një aktiviteti të tillë shkencor, duke formuar tashmë një rrjet studentësh nga të gjitha trevat shqiptare, që mësojnë, trajnohen dhe ndajnë eksperiancat e tyre në fushën e lirisë së besimit.