KRENARISË SË NJERËZIMIT – PROFETIT MUHAMED (A.S.) (Nga Hafiz Ali Korça dhe Hafiz Ibrahim Dalliu – Zoti i mëshiroftë)

Sep 11, 2024 Zani i Nalte Editoriale 0

---

LINDJA E DIELLÎT TË NJERËZIMIT

Nj’ errësir’ e tmerrshme botën kish mbuluar
Nga gjith anët kombet kjenë turbulluar

S’kish mbetur gjikundi nji moral i bukur
Diturija, feja fare ishte çdukur.

Ligësi e madhe plakosur dynjanë
Të bijt e Ademit njeri tjatrin hanë.

Kishte perënduar diell’ i njerëzimit.
Akoma s’kish lindur han’ e lulëzimit.

Donte nevoja të delte nji dritë
Për të zgjuar botën që kish ngel e mpitë.

Kish afruar koha do të grisej reja
Do të përsëritej e vërteta feja.

Gjith librat e shënjta sihariq thërrisnin
Lindjen e AHMEDIT pa-durim e prisnin,

Nat’ e dymbëdhet’ e Rebiul-ev-velit
Ajy yll i bukur ka zbritur prej qiellit.

Ajy shpirt i bukur e ndriçoj dynjanë
Ç’ka krijuar ZOTI mirs-ardhe i thanë.

Për të ngjallur zëmrat të çoj Perëndija
Me përkrahjen t’ënde u ngjall diturija.

Gjithë njerëzija ty të qofshin falë,
Shërbimet e tua s’tregohen me fjalë.

Veç se njerzimit tjater s’ke mejtuar
Vetëm për të sheruar shpirtat je munduar.

Shërbimet q’i bëre O shpirt njerzisë
Tregojnë q’u çove drejt prej Perëndisë.

Alejqes-selam them o i madhi ynë
Na ke zbardhur faqen, na ke çelur synë.

Alejqes-selam se nga shirqi na qite
Me Kur-an’ e naltë shpirtin na ndrite.

HAFIZ ALI KORÇA (pjesë e shkëputur) – Marrë nga revista “Zani i Naltë”, Nr. 1, f .7-9, Tetor 1923.

NJI LUTJE SHPIRTIT TË SHËNJTUESHËM TË PEJGAMBERIT T’ANË (ALEJHISELAM)

Ti je Diell’ i dituniës,
Ja ke ndriçue sytë njerzis
Je i dashm’ i Perëndis
N’doresh ja Resulell-llah!

N’rruzllit t’dheut ane e m’anë
Në çdo çast thirret ezanë
Ty Resulull-llah tu t’thanë
N’doresh ja Resulell-llah!

Ti je shembull’ i gjithë mirësivet
Ti je ma i ndershmi i nebivet
Si elmasi n’varg t’inxhivet
N’doresh ja Resulell-llah!

Ti na e ke kënduë Kur-anin
Ti na e ke mësuë Imanin
Ti na e ke diftuë dermanin
N’doresh ja Resulell-llah!

Por se na at’udhë nuk po e ndjekim
Përnej po vujm e po hjekim
Prap ke ti kryet e përpjekim
N’doresh ja Resulell-llah!

Vetëm ke ti asht uzdaja,
Se veç ty do t’shkojë rixhaja,
Kurban t’u baftë gjithë dynjaja,
N’doresh ja Resulell-llah!

Por n’dete t’fajvet jem kah mbytmi,
Me faqe n’pluhnit po zhytmi,
Ditn’ e vajit kur do t’pytmi,
N’doresh ja Resulell-llah!

Kur t’na epen n’dorë tefterët,
Kur t’thonë “nefsi, nefsi” tjerët
Kur t’tremben dhe pejgamberët,
N’doresh ja Resulell-llah!

Punët kur do të na shikohen,
T’mira e t’liga kur t’peshohen,
Të mçeftat kur t’na zbulohen,
N’doresh ja Resulell-llah!

Kur t’kalojmë n’urët Siratit,
T’randuem tepër prej mëkatit,
Mos na dajë prej shefaatit
N’doresh ja Resulell-llah!

HAFIZ IBRAHIM DALLIU (pjesë e shkëputur) – Marrë nga libri “ E lemja e të madhit Pejgamber dhe jeta e tij (a.s.), Botim i KMSH, Tiranë 2016. Botimi i parë 1934.

---

• Hafiz Ali Korça, Hafiz Ibrahim Dalliu, Mevlud, Profetit Muhamed (a.s.)