Sesion shkencor për Hafiz Ali Ulqinakun

Apr 24, 2014 Zani i Nalte Aktivitete 0

---

Me rastin e 101 vjetorit të ndërrimit jetë të dijetarit të shquar H. Ali Ulqinaku, më 23 prill 2014, në mjediset e Bibliotekës së qytetit në Lezhë, Myftinia Lezhë në bashkëpunim me bashkinë e këtij qyteti, organizuan një veprimtari shkencore në përkujtim të jetës së personalitetit të shquar, Mësuesit të Popullit, përkthyesit dhe studiuesit Hafiz Ali Ulqinaku.

Në sesionin shkencor “Hafiz Ali Ulqinaku – Mësues i popullit dhe Qytetar Nderi i Lezhës” morën pjesë përfaqësues të lartë të KMSH-së, pushtetit vendor, studiues, akademikë, shkrimtarë, mësues, familjarë dhe dashamirës të mësuesit të nderuar Hafiz Ali Riza Ulqinaku të ardhur nga Ulqini, Shkodra, Lezha dhe Tirana.

Programi i moderuar nga kryetari i Bashkisë Lezhë z. Viktor Tusha ishte i pasur me kumtesa shkencore, ku studiues të shumtë folën për rolin dhe kontributin e shquar si patriot, gjuhëtar dhe personalitet me vlera të veçanta të H. Ali Ulqinakut, si dhe u theksuan aftësitë e tij gjuhësore, letrare, studimore, dhe shfrytëzimi i këtyre aftësive në shërbim të shoqërisë dhe kombit shqiptar. Kumtesat hidhnin dritë gjithashtu mbi vlerën leksikologjike, gjuhësore, dialektologjike dhe sociologjike të fjalorëve të tij.

Aktiviteti është hapur me përshëndetjet e kryetarit të bashkisë z. Viktor Tusha dhe nënkryetarit të KMSH-së H. Gazmend Aga. Ndër studiuesit dhe akademikët e shumtë që mbajtën kumtesa ishin Prof. Dr. Mark Vuji me temë “Jeta dhe vepra e lavdishme e Hafiz Ali Ulqinakut”, Prof. Dr. Musa Kraja me temë “Personaliteti social-pedagogjik i Hafiz Ali Ulqinakut”, studiuesi nga Ulqini Sutki Malohoxha me temë “Hafiz Aliu-në këndvështrimin Ulqin-Shkodër-Lezhë”, Prof. Dr. Tonin Çobani me temë “H. Ali Ulqinaku, rilindësi i fundit midis Ulqinit e Lezhës”, si dhe studiues dhe personalitete të tjera të artit dhe kulturës të cilët përshëndeten këtë aktivitet.

Në këtë aktivitet kanë mbajtur nga një kumtesë edhe myftiu i Lezhës H. Erton Yzeirllari me temë “Jeta dhe aktiviteti i Hafiz Ali Ulqinakut në dritën e dokumentave dhe fakteve historike”, si dhe myftiu i Ulqinit H. Ali Bardhi me temë “Çështja e Mevludit si tekst shkollor e vlerë kombëtare për gjuhën shqipe”.

Nga Komuniteti Mysliman i Shqipërisë merrnin pjesë krahas nënkryetarit H. Gazmend Aga, Drejtori i Kulturës z. Genti Kruja, Drejtori i Haxhit z. Hamdi Curri dhe intelektualë myslimanë nga Ulqini, Shkodra dhe Lezha.

---