Zani i Naltë – Shkup, Konferencë Shkencore kushtuar kolanës “Zani i Naltë”

Shkup, Konferencë Shkencore kushtuar kolanës “Zani i Naltë”

Nov 25, 2016 Zani i Nalte Aktivitete 0

Me datë 24 nëntor 2016 është zhvilluar në Shkup Konferenca e III-të Shkencore kushtuar kolanës “Zani i Naltë”, me titull, “Zani i Naltë – Thesari kulturor, fetar e kombëtar”, organizuar nga Bashkësia Fetare Islame e Maqedonisë në Fakultetin e Shkencave Islame.

Pas dy konferencave shkencore të zhvilluara gjatë këtij viti në Tiranë dhe Prishtinë, tashmë është zhvilluar edhe konferenca e radhës nga në Shkup, mbajtur në ambeintet e Fakultetit të Shkencave Islame.

Të pranishëm në këtë konferencë kanë qenë krerët e bashkësive dhe komuniteteve myslimane të Shqipërisë, Kosovës dhe Maqedonisë, përfaqësues të lartë nga këto institucione, myftinj, akademikë dhe studiues.

Në seancën e përshëndetjeve kanë mbajtur fjalën e rastit kryetari i Komunitetit Mysliman të Shqipërisë H. Skender Bruçaj, Myftiu i Kosovës H. Naim Tërnava dhe Kryetari Bashkësisë Fetare Islame të Maqedonisë H. Sulejman Rexhepi.

Gjatë fjalës së tij kreu i KMSH-së ka theksuar se, “Tribuna intelektuale e revistës Zani i Naltë, në përgjigje jo vetëm të nevojave të kohës, mbeti gjatë në memorien e zhvillimit kulturor të shqiptarëve, duke kontribuuar në pasurimin e vlerave të shoqërisë shqiptare.

Sot, edhe pse ka kaluar gati një shekull nga themelimi i vet, artikujt e revistës Zani i Naltë mbeten sa aktualë, aq edhe edukues dhe me mjaft vlera kulturore e arsimore, duke u bërë kështu një tribunë e trashëgimisë intelektuale te shqiptarët.

Tanimë u takon studiuesve që nëpërmjet këtij botimi të hulumtojnë dhe të nxjerrin mësime të dobishme, duke u bazuar në artikujt e revistës, që trajtojnë çështje që e ruajnë akoma aktualitetin e tyre edhe sot e kësaj dite”, ka thënë ndër të tjera kryetari z. Bruçaj.

Më pas është zhvilluar seanca shkencore nën moderimin e dekanit të Fakultetit të Shkencave Islame të Maqedonisë Doc. Dr. Faredin Ebibi. Kumtesa nga Komuniteti Mysliman i Shqipërisë kanë mbajtur nënkryetari H. Gazmend Aga dhe Drejtori i Kulturës Dr. Genti Kruja. Në panelin e kumtesave shkencore kanë referuar gjashtë panelistë nga Shqipëria, Kosova dhe Maqedonia, siç ishin:

Dr. Naser Ramadani, FSHI-Shkup,

“ Mendimi pedagogjik në revistën Zani i Naltë”.

H. Resul Rexhepi, BIK-Prishtinë,

“ Zani i Naltë projekt i mendimtarëve vizionarë”.

H. Gazmend Aga, KMSH

“Gruaja në revistën Zani i Naltë”

Z. Ziber Lata, FSHI-Shkup,

“ Shumëdimensionaliteti dhe reflektimet e Zanit të Naltë”.

Dr. Genti Kruja, KMSH-Tiranë,

“Zani i Naltë, një shekull në shërbim të dijes”.

Beqir ef. Memeti, BFI-Shkup,

“Zani i Naltë-zëdhënës i mendimit intelektual të myslimanëve shqiptarë”.

Gjatë ditës së konferencës delegacioni i KMSH-së i kryesuar nga kryetari H. Skender Bruçaj ka zhvilluar edhe një takim me krerët e bashkësive islame dhe me dekanin e FSHI-së, ku kanë folur për projekte të tjera të përbashkëta. Kryetari i KMSH-së i ka dhuruar gjithashtu atyre disa kopje të botimeve të fundit të KMSH-së.