Zani i Naltë – Zhvillohet simpoziumi ndërkombëtar: “Roli i edukimit fetar në promovimin e një kulture të përparimit dhe zhvillimit”

Zhvillohet simpoziumi ndërkombëtar: “Roli i edukimit fetar në promovimin e një kulture të përparimit dhe zhvillimit”

Feb 28, 2021 Zani i Nalte Aktivitete 0

Ditën e mërkurë, me 24 Shkurt 2021 Departamenti i Shkencave Islame në KU Bedër organizoi simpoziumin virtual ndërkombëtar me titull: “Roli i edukimit fetar në promovimin e një kulture të përparimit dhe zhvillimit”

Në këtë simpozium morën pjesë një grup studiuesish nga bota Islame siç vijon:

H. Bujar Spahiu, Kryetar i Komunitetit Mysliman të Shqipërisë
Dr. Mohamad Bachari, Sekretari i Përgjithshëm i Këshillit Botëror të Komuniteteve Myslimane, Emiratet e Bashkuara Arabe
Dr. Mustafa Cerić, President i Kongresit Botëror Boshnjak, Bosnjë & Hercegovinë
H. Resul Rexhepi, ish-Sekretar i Përgjithshëm i BIK, Kosovë
Dr. Naser Ramadani, Fakulteti i Shkencave Islame, Maqedonia e Veriut
Dr. Jamal el Seferty, Departamenti i Shkencave Islame, KU Bedër, Shqipëri.

Panelistët dhanë një pasqyrë të situatës së arsimit fetar në shtetet përkatëse, rolin që ka patur dhe vazhdon të ketë për mbarë shoqërinë. Ata qëndruan mbi rolin e arsimit fetar universitar në rilindjen dhe zhvillimin e kombeve. Gjithashtu ju kushtua një rëndësi rishikimit të kurrikulës së arsimit fetar në institucionet arsimore fetare, përfshirë universitetet, shkollat e mesme si dhe ato 9-vjeçare në përputhje me kërkesat e kohës duke patur parasysh që të mos bien në kundërshtim me parimet e fesë së pastër, dhe për të qenë e tillë duhet të ndiqen nga një proces aktiv për reformën e procesit arsimor në institucionet arsimore fetare. Në mënyrë që ky proces të ketë sukses, duhet të ketë përpjekje të bashkërenduara dhe bashkëpunim të vazhdueshëm me aktorët e rëndësishëm në botën islame dhe perëndimore, si dhe specialistë dhe studiues me eksperiencë të shkencave Islame brenda dhe jashtë rajonit.

Në fjalën e tij, Kryetari Spahiu, theksoi rolin e arsimit fetar në promovimin e kulturës së përparimit dhe zhvillimit të shoqërisë.

“Ky arsim, i cili ka filluar me zbritjen e Kuranit Famëlartë dhe ka vazhduar deri në ditët tona, ka për qëllim të ndërtojë një shoqëri që bazohet në drejtësi e tolerancë dhe të t’i japë rëndësi themelore dijes si bazë për qytetërim e zhvillim. Në këndvështrimin e Islamit të gjitha dijet e shkencat e dobishme gëzojnë konsideratë të lartë.” – tha ai gjatë fjalës së tij.

Simpoziumi, i cili u zhvillua online, vijoi me tej me referimin e të lartëpërmendurve, të cilët bënë një pasqyrim të të situatës së arsimit fetar në shtetet përkatëse, duke theksuar arritjet e deritanishme, problematikat e hasura ndër vite, si dhe të ardhmen e afërt në këtë kontekst.

Simpoiumi i zhvilluar në arabisht u moderua nga z. Hysni Skura, lektor në Departamentin e Shkencave Islame, Bedër. Ky ishte aktiviteti i parë në llojin e tij të cilin do ta pasojnë një sërë aktivitetesh të ngjashme.