Zani i Naltë – Konferencë ndërkombëtare dhe shkencore mbi arsimin islam te shqiptarët

Konferencë ndërkombëtare dhe shkencore mbi arsimin islam te shqiptarët

Oct 03, 2016 Zani i Nalte Aktivitete 0

Është zhvilluar konferenca shkencore dhe ndërkombëtare “Arsimi islam te shqiptarët: Sfida dhe perspektiva”, konferencë e cila ka mbledhur emrat më të njohur të shkencave didaktike dhe filologjike islame nga Shqipëria, Kosova, Maqedonia, Mali i Zi, Presheva, Bosnja dhe Austria.

Konferenca u mbajt në Tivar të Malit të Zi në datat 1-2 tetor 2016. Drejtuesit kryesor të arsimit islam të cikleve të ndryshme arsimore nëpër trevat shqipfolëse, pedagogë dhe studiues të fushës përmes kumtesave parashtruan situatën aktuale të arsimit islam, si dhe perspektivën në të ardhmen.

Komuniteti Mysliman i Shqipërisë u përfaqësua nga Drejtori i Kulturës, Dr. Genti Kruja, i cili referoi me temën “Medresetë e Shqipërisë, model i edukimit shkencor e fetar”.

Në fjalën e tij z. Kruja u shpreh se medresetë në Shqipëri kanë pasur një rëndësi të madhe sa i përket arsimit dhe edukimit të brezit të ri. “Mbase në një të ardhme të afërt, në sajë të këtyre medreseve, mendja dhe shpirti do të përqafojnë njëri-tjetrin përsëri. Ndërgjegjja dhe logjika do të plotësojnë thellësitë e njëra-tjetrës dhe gjithçka do të gjejë mundësinë për të shprehur bukurinë dhe atmosferën e paqes”, nënvizoi z. Kruja.

Konferenca pati rreth 30 kumtesa shkencore, të ndara në 6 sesione kryesore.

Kjo konferencë u organizua nga bashkëpunimi mes Institutit Ndërkombëtar të Mendimit Islam (IIIT), me qendër në SHBA dhe Institutit Shqiptar të Mendimit dhe të Qytetërimit Islam (AIITC) në Shqipëri.