Konkluzionet e Konferencës Ndërkombëtare në Studimet Islame

Apr 07, 2018 Zani i Nalte Editoriale 0

---

 

1. Si myslimanë, ne duhet të kuptojmë që jemi pjesë edhe e problemeve, por edhe e zgjidhjeve të tyre, për të kaluar me sukses sfidat e ditëve të sotme.
2. Nevoja e interpretimit të çështjeve islame nga njerëz të përgatitur teologjikisht, që janë pjesë e kulturës dhe traditës vendase në çdo shtet të Ballkanit, nëpërmjet institucioneve përfaqësuese zyrtare dhe qendrave akademike kompetente.
3. Roli historik i medreseve në Ballkan, si pjesë e kontinentit evropian në edukimin e prijësve myslimanë dhe kultivimin e inteligjencës islame është shumë i vyer dhe i domosdoshëm. Ruajtja dhe forcimi i këtij roli, si dhe përditësimi i kurrikulave dhe metodikës shkencore të edukimit në këto shkolla mbetet një nevojë.
4. Myslimani duhet të ruajë identitetin e tij fetar në shoqërinë moderne, duke qëndruar larg komplekseve dhe duke u integruar në këto shoqëri, në një botë që globalizohet gjithnjë e më tepër.
5. Roli i përfaqësimit të Islamit në një nivel të lartë intelektual, social, kulturor dhe arsimor, na del përballë, si një domosdoshmëri e kohës dhe realitetit në të cilin jetojmë ne sot.
6. Shkollat, kulturat dhe rrymat e ndryshme islame, pavarësisht se janë një pasuri e rëndësishme në shumë dimensione, në momentin që hyjnë në vendet tona duhet të përshtaten dhe të mos bien ndesh me kulturën dhe traditat tona. Për këtë një rol të rëndësishëm duhet të kenë vetë institucionet përfaqësuese fetare.
7. Formimi dhe përgatitja e thirrësit islam sipas kritereve të nevojshme për prezantimin sa më të shëndoshë të Islamit është një nga detyrat, që nevojitet të merret përsipër me seriozitetin maksimal nga institucionet edukative dhe fetare islame në Ballkan dhe në të gjithë Evropën.
8. Rritja e rolit të intelektualëve myslimanë për t’i dhënë zgjidhje bashkëkohore problematikave, me burim nga e kaluara dhe koha që po jetojmë sot.
9. Rritja e ndërgjegjes qytetare, politike, arsimore dhe edukative për ruajtjen e familjes nga krizat, që e rrezikojnë gjithnjë e më tepër.
10. Bashkëpunimi dhe dialogu ndërfetar duhet të vihet mbi baza solide teologjike dhe historike, duke u promovuar nga vetë institucionet fetare dhe akademike të tyre, si dhe kurrikulat zyrtare.
11. Rritja e bashkëpunimit brenda myslimanëve, duke marrë përgjegjësitë që na takojnë në dobi të kauzës së Islamit, pa rënë pre e instrumentalizimit dhe përdorimit politik të ndjenjave fetare.

Bordi Shkencor i Konferencës Ndërkombëtare ‘Sfidat e myslimanëve në shekullin e XXI’

Tiranë, 5 prill 2018

---

• ISCON, konferencë ndërkombëtare, shkenca, studime islame