Zani i Naltë – Riakreditohen me 5 vjet programet e studimeve Bachelor dhe Master në Shkencat Islame, Bedër

Riakreditohen me 5 vjet programet e studimeve Bachelor dhe Master në Shkencat Islame, Bedër

Nov 13, 2019 Zani i Nalte Aktivitete 0

Bordi i Akreditimit i Agjencisë së Sigurimit të Cilësisë në Arsimin e Lartë (ASCAL), me vendim nr. 65 të datës 4.10.2019, vendosi për riakreditimin e tre programeve të studimit të Shkencave Islame, Bedër me kohëzgjatjen prej 5 (pesë) vitesh akademike.

Tre programet e studimit, Bachelor në Shkenca Islame, Master në Shkenca Themelore Islame dhe Master në Shkenca Moderne Islame, akreditohen për herë të dytë, që pas themelimit të Departamentit të Shkencave Islame pranë Kolegjit Universitar Bedër.
Në vendimin e shpallur në faqen zyrtare të institucionit të mësipërm, theksohet se në shqyrtimin e dokumentacionit dhe raporteve është konstatuar se, procedura dhe procesi i vlerësimit është kryer në përputhje me parashikimet ligjore dhe nënligjore dhe afatet e përcaktuara në këto akte; vlerësimi në përmbajtje është i mbështetur në dokumentacionin e Vetëvlerësimit, Vlerësimit të Jashtëm dhe gjetjet e verifikimet gjatë vizitës në institucion; rezultati i akreditimit të parë të këtij programi ka qenë Pozitiv, si dhe institucioni ka përmbushur rekomandimet e lëna nga akreditimi i parë.
Mbështetur mbi rezultatet dhe arsyetimin e mësipërm, Bordi i Akreditimit, vendosi:
1. Vlerësimin Përfundimtar POZITIV për programet e studimit Bachelor në Shkenca Islame, Master i Shkencave në “Shkenca Themelore Islame” dhe Master i Shkencave në “Shkenca Moderne Islame”, të Kolegjit Universitar “Bedër”.
2. Akreditimin e programeve të studimit me kohëzgjatjen prej 5 (pesë) vitesh akademike.
3. Afati përfundimtar i vlefshmërisë së akreditimit të programit të studimit është 30/09/2024.
4. Ngarkohet Agjencia e Sigurimit të Cilësisë në Arsimin e Lartë për zbatimin e këtij Vendimi, publikimin dhe lëshimin e certifikatës se akreditimit brenda një muaji nga data e marrjes së këtij vendimi, si dhe monitorimin për ruajtjen në vijim të Standardeve Shtetërore të Cilësisë.
Ky Vendim hyn në fuqi menjëherë, thuhet në faqen zyrtare të ASCAL.