Zani i Naltë – Zhvillohet Konferenca e III Ndërkombëtare në Studimet Islame (ISCON) “Islami dhe sfidat e familjes në shoqërinë bashkëkohore”

Zhvillohet Konferenca e III Ndërkombëtare në Studimet Islame (ISCON) “Islami dhe sfidat e familjes në shoqërinë bashkëkohore”

Mar 06, 2020 Zani i Nalte Aktivitete 0

Departamenti i Shkencave Islame në Universitetin Bedër, në bashkëpunim me Komunitetin Mysliman të Shqipërisë dhe Këshillin Botëror të Komuniteteve Myslimane, organizuan me dt. 5 mars 2020, Konferencën e III Ndërkombëtare në Studimet Islame, me temë: “Islami dhe sfidat e familjes në shoqërinë bashkëkohore”.

Kjo konferencë mblodhi së bashku mbi 20 akademikë dhe studiues, të cilët në referimet e tyre u fokusuan në trajtimin e temave të ndryshme rreth rolit, rëndësisë dhe sfidave që familja po has çdo ditë. Pjesëmarrësit në të, ishin nga vende të ndryshme të botës, siç janë: Shqipëria, Kosova, Gjermania dhe Emiratet e Bashkuara Arabe.

Dr. Genti Kruja, kreu i kësaj konference gjatë fjalës së tij qëndroi mbi rëndësinë dhe vlerën e edukimit ku tha se, “përsosmëria e një kombi dhe një shoqërie nis nga familja dhe nisur nga kjo, edukimi duhet filluar nga familja. Edukatorja e parë, është nëna. Përgatitja e nënave si edukatore është baza më e rëndësishme për ekzistencën dhe vazhdimësinë e një populli.”

Kryetari i KMSH-së, H. Bujar Spahiu në fjalën e tij përshëndetëse ndër të tjera tha se: “Familja është baza e ekzistencës së llojit njerëzor, me të cilën fillon e mbaron jeta individuale e secilit. Në familje çdo individ duhet të gjejë qetësi e ngrohtësi, sepse ajo është ngritur mbi bazën e dashurisë së sinqertë dhe mirëkuptimit reciprok, që siguron jetesë të lumtur”.

Ndërkohë, në fjalën e tij, rektori i Universitetit Bedër, Prof. Dr. Ferdinand Gjana falënderoi të gjithë akademikët dhe studiuesit për punimet e prezantuara në këtë konferencë, si dhe gjithashtu qëndroi mbi rëndësinë, që kanë familja, mësuesit, edukatorët dhe liderët fetarë në përcjelljen e mesazhit të drejtë dhe edukimit të pastër të brezave të rinj në shoqërinë e sotme.

Në konferencë merrnin pjesë studiues dhe akademikë, përfaqësues të shoqërisë civile, drejtues të Komunitetit Mysliman, studentë, etj.

Në përmbyllje të seancave Bordi Shkencor i Konferencës doli me disa konkluzione, ku ndër kryesoret mund të përmendim:

Familja është një institucion i frymëzuar nga Zoti. Ajo nuk është zhvilluar nëpërmjet proceseve eksperimentale të evolucionit njerëzor e as rastësisht gjatë rrjedhës së kohës.
Familja është njësia themelore në shoqëri dhe është e organizuar në atë mënyrë që të veprojë si bashkësi në miniaturë.
Islami i këshillon prindërit që t’i trajtojnë fëmijët e tyre me mëshirë, dashuri dhe barazi.
Dhurata më e mirë që një prind mund t’i bëjë fëmijës së tij është edukimi i mirë.
Rol kryesor mbrojtës, në këtë rrugëtim të familjes, kanë feja dhe tradita si institucione, që organizojnë jetën shoqërore.
Në këndvështrimin e fesë islame, gruaja ka një pozicion që formon familjen dhe është bartësi kryesor i strukturës aktuale shoqërore.
Ndër disiplinat më themelore, që duhet të analizohet në emër të komunikimit të shëndetshëm brenda familjes është konsultimi.
Edukimi i fëmijëve është kthyer në një nga sfidat më të mëdha të kohës që jetojmë.