Vizitë H. Ismail Muçej, kryeredaktorit të parë të “Drita Islame”

Oct 28, 2016 Zani i Nalte Aktivitete 0

Stafi i Drejtorisë së Kulturës në Komunitetin Mysliman, i kryesuar nga drejtori, Dr. Genti Kruja, zhvilloi një vizitë në shtëpinë e kryeredaktorit të parë të gazetës “Drita Islame”, H. Ismail Muçej.

Dr. Genti Kruja e falënderoi z. Muçej për pritjen dhe i përcolli urimet më të përzemërta të Kryetarit të Komunitetit Mysliman, H. Skender Bruçaj dhe punonjësve të institucionit. Po ashtu ai vlerësoi lart kontributin e z. Muçej për gazetën “Drita Islame” dhe zhvillimin e periodikut islam në gjuhën shqipe.

Nga ana e tij, z. Muçej falënderoi z. Kruja dhe bashkëpunëtorët e tij për vizitën, duke vlerësuar maksimalisht punën e Drejtorisë së Kulturës në fushën e botimeve dhe kontributin e gjerë e të larmishëm të Komunitetit Mysliman gjatë këtyre viteve.

Përgjatë rikujtimit të ngjarjeve dhe mjaft detajeve mbresëlënëse, u risoll edhe njëherë në vëmendje klima e kohës dhe atmosfera, që mbizotëronte në ditët e para të rihapjes së Komunitetit Mysliman dhe nxjerrjes së numrave të parë të gazetës “Drita Islame” në vitet ‘90.

Në shenjë respekti z. Kruja i dhuroi z. Muçej kolanën “Zani i Naltë” prej 10 vëllimesh dhe disa kopje të numrave të fundit të revistave “Drita Islame” dhe “Zani i Naltë.

Kjo vizitë ishte tregues i drejtpërdrejtë i vlerësimit që institucioni ynë ka për figura dhe personalitete, që kanë lënë gjurmë në përhapjen e fesë dhe zhvillimin e kulturës islame në vendin tonë. Ismail Muçej e drejtoi gazetën “Drita Islame” përgjatë viteve 1992-1999. Falë eksperiencës dhe erudicionit të tij, gazeta njohu një rritje të shpejtë, duke u bërë një emër shumë i njohur në Shqipërinë e asaj kohe. Për kontributin e gjerë dhe tepër domethënës, emri i tij do të skalitet në kujtesën e këtij organi shtypi.

Në këtë takim ishin të pranishëm edhe z. Agron Hoxha, ish-kryeredaktor dhe drejtor i “Drita Islame” në vitet 2003-2014, aktualisht drejtor i Zyrës së Marrëdhënieve me Publikun në Universitetin Bedër dhe teologu Arben Halluni, përfaqësues në Myftininë Shkodër, Haxhi Lika, Andrin Rasha dhe Hysen Vogli, anëtarë të stafit të Drejtorisë së Kulturës në KMSH. (27.10.2016)